Эртен, февраль 8-те, бүдүн чуртка Россияның эртем хүнүн демдеглээр. Чарлаттынган Эртем айының дургузунда республиканың албан черлери уругларга эртем адырын нептередир сорулгалыг хемчеглерни эрттирип турарын ТР-ниң Өөредилге яамызы дыңнаткан.
Тываның өөредилге сайыдының хүлээлгезин күүседип турар [id16282405|Ренат Ооржак] Национал школа хөгжүдер институтка болуп эрткен ажык эжиктер хүнүнүң дугайында бодунуң блогунда бижээн.
– Национал школа хөгжүдер институт школачыларга ажык эжиктер хүнүн эрттирген. Ол таварылга эвес – албан чериниң бүгү ажыл-чорудулгазы тыва дылды камгалап, ону хөгжүдеринче угланган. Ол дээрге тыва дыл болгаш чогаал номнарын, өөредиглиг фильмнерни белеткээри, «Тыва дыл – уругларга», «Школа ном саңнарында тыва чогаалчыларның чогаалдары», «Тываның улусчу оюннары – уругларга» дээн ышкаш программаларны ажылдап кылыры болгаш оон-даа өске хемчеглер болур – деп, Ренат Ооржак демдеглээн.
Ажык эжиктер хүнүнүң аалчылары, Тоора-Хем школазының 12 өөреникчизи база Кызыл хоорайның 19 дугаар школазындан 36 өөреникчи национал хевин кедип алгаш, солун программалыг ужуражылгага киришкеннер. Уруглар тыва национал оюннарны ойнап, караокеге ырлажып, орфографтыг диктантыны бижээннер. Оон аңгыда «Төрээн чуртун эки билири» интеллектуалдыг оюнга киржип, графиктиг дизайның кол үндезини-биле танышканнар. А блокнотту кылырының дугайында мастер-класс уругларга уттундурбас болуп артары чугаажок. Олар кылып алган блокноттарын белекке алганнар.
– Меңээ эң-не солун болган чүүл – планшетке чурууру болду. Оон ыңай мында тыва дыл болгаш чогаал номнарын белеткеп турарын билип алдым. Ооң мурнунда номнарны кым кылып, белеткеп турарының дугайында сонуургавайн турдум – деп, алдыгы классчы Айда-Сай Кол чугаалаан.
Ажыктыг болгаш солун хемчеглер соонда уруглар сүттүг шай, боорзак, саржаглыг тыва далган болгаш кажык хевирлиг карамельдерни амзааннар.
Ол ышкаш Россияның Эртемнер академиязының Сибирь салбырының Тываның бойдус курлавырларын комплекстиг шиңгээдириниң талазы-биле институт, Тываның күрүне университеди дээш оон-даа өске албан черлери аныяк-өскенге боттарының ажыл-ижин таныштырып, солун хемчеглерни эрттирерин уламчылап турар.
