Эртем хүнүнге уткуштур ажыктыг болгаш солун ужуражылга

Кызылдың транспорт техникумунуң сургуулдарынга Национал школа хөгжүдер институттуң эртем секретары, ф.э.к. А.Х. Херел биле тыва филология лабораториязының биче эртем ажылдакчызы Ч.О. Хомушку Эртем хүнүнге уткуштур «Тываларның чугаа этикеди» деп темага диспут-оюнну эрттиргенин институт дыңнаткан.

Кижилер чугаалажып харылзажыр болганда, хүн бүрүде аңгы-аңгы таныыры, танывазы кижилер-биле ужуражып, мендилежип, билбес чүлүүн айтырып азы айтып берип, чамдыктарынга арга-сүме кадып, байырлажып, четтиргенин илередип, чалап, уткуп дээш өске-даа амыдыралчы харылзааларны тудуп чоруур.

Ындыг харылзааларны тываларның байлак аас чогаалының эгээрттинмес эртинелериниң чижээнге, сагып чораан ёзу-чаңчылдарынга даянып, институттуң ажылдакчылары сургуулдарга ажыктыг болгаш солун хемчегни эрттирген. Аңаа техникумнуң 1, 2, 3 дугаар курстарының дөрт аңгы мергежилинде өөренип турар 150 хире сургуул болгаш алды куратор башкы киришкен.