Тываның күрүне университединиң филология факультединиң тыва филология болгаш ниити дыл эртеминиң кафедразы чылдың-на Тыва дыл хүнүнге тураскааткан «Ш.Ч. Сат номчулгалары" деп эртем-практиктиг конференцияны эртирип турарын Национал школа хөгжүдер институт дыңнаткан.
Бо чылын болуп эрткен конференцияга дөрт секция ажылдаан: «Тыва дыл болгаш ооң башкылаашкынының чугула айтырыглары», «Тыва чогаал болгаш ооң башкылаашкынының чугула айтырыглары», «Тыва дыл чогаал кичээлдеринге электроннуг өөредилге курлавырларын ажыглаары», «Эге школага тыва дыл болгаш литературлуг номчулганы башкылаарының айтырыглары».
Национал школа хөгжүдер институдунуң эртем ажылдакчылары болгаш методистери боттарының ажылының үре-түңнелин көргүзүп, аңгы-аңгы секцияларга дыңнадыгларын кылганнар.
Кызылдың А. А. Даржай аттыг педагогика институдунуң башкылары болгаш студентилери эртем-практиктиг конференцияга идепкейлиг киржип, «Литературлуг номчулга кичээлдеринге өөреникчилерниӊ чогаадыкчы чоруун сайзырадырыныӊ аргалары, «С.Б. Пюрбюнуӊ чогаалдарын эге школага литературлуг номчулга кичээлдеринге өөредири», «С.Б. Пюрбюнуӊ шүлүктерин эге школага класстан дашкаар ажылдарга ажыглаары», «Тыва болгаш орус хуулгаазын тоолдарда кыс маадырларныӊ овур-хевириниӊ деӊнелгези» деп темаларга илеткелдерин таныштырган.
Конференцияга республикадан келген башкылар боттарының арга-дуржулгалары-биле үлежип, чаа-чаа чүүлдерни билип алганнар.