Хөй чылдар дургузунда республиканың К.И. Чуковский аттыг уруглар ном саңы-биле сырый харылзаалыг кады ажылдап, уругларны ном делегейинче чедип, оларны номчулгага хаара тудуп, номга ынак болурун өөредип чоруур ном саңының улуг өңнүү Кызылдың 2 дугаары школазының эге класстар башкызы Ольга Сарыгларның тургусканы «Тывызыкты тыппышаан өөрениили» деп эртем-өөредиглиг ному чырыкче унген.
Чаа ном эге школаның 1-4 класстарының өөреникчилеринге таарыштыр ажылдап кылдынган. Ном уругларның төрээн дылынга сонуургалдыг болурунче угланган, база оларның делгем, ханы угаап боданырын сайзырадыр, сөстерни шын адап чугаалаарынга чаңчыктырар сорулгалыг бижиттинген.
Бердинген номда тыва улустуң тывызыктарын, утка болгаш хевириниң онзагай чүүлдерин барымдаалааш, беш бөлүкке чарып тургускан: метафоралыг, үш дөстүг тывызыктар, бодалга, баштактаныг, даалга, саналгалыг тывызыктар. Тывызык бүрүзү номда чаңгыс катап ажыглаттынып турар 36 үжүктүң аразында орус дылдан үлегерлеп алган сөстерни үннүг туружун көрүп тургаш киирген.
Бо ном башкыларга, ада-иелерге дузаламчы болур болгаш уругларга тыва дылын эки билип алырынга ажыктыг.
