Шагаан-Арыгның көшкүн чоннуң парыгынга чогаал шинчилекчизи, публицист, Тываның гуманитарлыг болгаш социал-экономиктиг тускай шинчилелдер институдунуң чогаал шинчилээр секторнуң эртем ажылдакчызы Василий Салчак-биле ужуражылга болуп эрткенин чагырга чери дыңнаткан.
Чалаткан аалчылар – Тываның Улустуң чурукчузу Начын Шалык база Тываның гуманитарлыг болгаш социал-экономиктиг тускай шинчилелдер институдунуң архив салбырының кол специализи Арина Дугаржап. Ужуражылганы Шагаан-Арыг хоорай чагыргазы, К.К. Кудажы аттыг төп ном саңының ажылдакчылары организастап эрттирген.
Василий Салчактың 27 чыл иштинде чоруткан эртем-шинчилел ажылының түңнелинде үндүргени Тыва литератураның үндезилекчизи, шүлүкчү, прозачы, драматург, очулдурукчу, Улуг-Хемниң чоргааралы, Тываның Улустуң чогаалчызы Сергей Бакизович Пюрбюнуң дугайында «С.Б. Пюрбюнуң эртем-шинчилелдиг намдары» деп номун таныштырган.
Автор Тываның Улустуң чогаалчызының амыдырал-чуртталгазы болгаш чогаадыкчы ажыл-ижин долузу-биле шинчилээн, тыва литературада чугула черни ээлеп турар үнелеп четпес улуг ажылды кылган. Номну таныштырып тура, Эъжимде болгаш Хайыраканда чурттап турар чогаалчының төрел-аймаа, салгалдары-биле ужуражып, чогаалчының амыдырал-чуртталгазын долузу-биле шинчилээнин чыылганнарга чугаалаан.
В.С. Салчактың хол-биле бижээн чогаалдарын Арина Дугаржап таныштырган. Номда чурук каасталгазын Начын Шалык чураан.
С.Б. Пюрбюнуң ачазы Бакыстайның кады төрээн акызы Сээн-оолдуң оглунуң уруу Галина Александровна Хууракпан улуг өгбезиниң дугайында эртем-шинчилел ажылын кылып, салгалдарга арттырган чаа ному дээш эртемденге четтиргенин илереткен.
К.К.Кудажы аттыг төп ном саңының делгээн «Ыдыкшылым – чуртум, чонум» деп С.Пюрбюнуң дугайында болгаш ооң чогаалдарынга тураскааткан ном делгелгезин келген чон, башкылар сонуургап көрген.
Эртемден кожууннуң ном саңнарынга чаа номунуң экземплярларын белек кылдыр үлеп берген.