Эртен 2027 чылда чаагайжыдар объектилер дээш бадылаашкын доостур

Июнь 12-де «Амыдыралга инфратургузуг» национал төлевилелдиң бир кезээ болур «Таарымчалыг хоорай хүрээлелин тургузары» федералдыг төлевилел-биле 2027 чылда чаагайжыдар объектилер дээш бадылаашкын доостур.

Тываның Баштыңы [id360104045|Владислав Ховалыг] республиканың чурттакчылыг черлерин оон-даа чараш болгаш таарымчалыг кылдыр кылыр төлевилелдер шилилдезинге идепкейлиг киржиринче регионнуң чурттакчыларын кыйгырган.

«Бистиң чурттакчылыг черлеривисте парктар, сесерликтер болгаш шөлдер кандыг болурун силер, Тываның чурттакчылары, тодарадып турар силер. «Амыдыралга инфратургузуг» национал төлевилели-биле эрткен чылын силерниң соңгуп турганыңар объектилерде ажылдар эгелээн, ынчалдыр 2026 чылда эвээш дизе 33 шөлдү чаагайжыдары планнаттынган. Бо ажыл «Чаңгыс демниг Россия» партияның 2017 чылдан бээр бүгү чуртта хөй-ниити шөлдерин өскертиринге дузалап турар «Таарымчалыг хоорай хүрээлелин хевирлээри» партийжи төлевилелиниң кезээ болур» – деп, Тываның Баштыңы бодунуң кыйгырыында айыткан.

ТР-ниң Тудуг яамызының дыңнатканы болза, июнь 10-га чедир Тываның 102810 чурттакчызы үнүн берген. Бо чылын Улуг-Хем кожууннуң чурттакчылары эң идепкейлиин көргүзүп, боттарының муниципалитеттеринде тургустунган деңнелди 189 хуу ажыр бадылаан.

Чамдык муниципалитеттерде соңгулданың сөөлгү хүннеринде федералдыг деткимче-биле чаагайжытттынар төлевилелдер дээш езулуг чижилге эгелээн.

Тываның тудуг яамызы канчаар бадылаарын сагындырган:
1) Күрүне ачы-дузалары порталда бодунуң арыны таварыштыр бүрүткедир азы кирер;
2) zagorodsreda.gosuslugi.ru сайтыда «Таарымчалыг хоорай хүрээлелин хевирлээри» деп кезекче кирер;
3) бирги ээлчегде чаагайжыдырын көрүксеп турар объект азы дизайн төлевилелин шилиир.

Ол ышкаш «Таарымчалыг хоорай хүрээлелин тургузары» федералдыг төлевилел эки турачызының дузазы-биле «Госуслуги Волонтер» капсырылгазы таварыштыр соңгуп болур силер. Силерден телефонуңар дугаары болгаш дөрт санныг код херек.