Эртен ус-шеверлерниң «Шагаа белээ» деп садыг-делгелгези эгелээр

Эртен Сергей Пюрбю аттыг улусчу чогаадылга бажыңынга республиканың ус-шеверлериниң «Шагаа белээ» деп садыг-делгелгези эгелээр.

Февраль 10-11 хүннеринде тускай аянныг национал хептер даарап турар шеверлер, дизайнерлер, каасталга болгаш эт-херексел кылыр ус-шеверлер боттарының ажылдарының садыг-делгелгезин Шагаа байырларының мурнунда эрттирер.

Ук делгелгеге торгудан, хорагайдан, кылымал хөмден база чымчадыр эттээн алгыдан тыва болгаш аңгы-аңгы тускай аянныг тоннар, чеңи-чоктар, бөрттер, идиктер, байырлалдарда болгаш хүн бүрүде кедип болур хептерни, хол-биле кылган херекселдер, каасталгалар, суй белектер, чемненир өрээлге эт-херекселдер, аът дериглерин делгеп салыр.

Делгелге дараазында адреске болуп эртер: Кызыл хоорай, Щетинкин-Кравченко кудумчузу, 46 дугаар бажың. Улусчу чогаадылга бажыңы. Болур үези: 10.00 шактан 17.00 шакка чедир.