Эрткен байырлалдарның оперативтиг байдалын сайгарып чугаалашкан

Тываның Чазааның аппарат хуралында байырлалдың дыштаныр хонуктары канчаар эрткенин сайгарып чугаалашкан.

Эрткен чылда 68 кем-херек база 20 аар херектер болган болза, бо чылдың баштайгы дыштаныр узун хонуктарында 32 кем-херек үүлгедиишкини демдеглеттинген, ооң тозу – аар херектер.

– Бо бүгү кем-херектерниң артында кижилерниң салым-чолу барын билзе чогуур. Кызыл хоорайга база Барыын-Хемчик кожуунга – ийи өлүрүүшкүн бүрүткеттинген. Ону ооң мурнунда шииттирип чораан кижилер кылган. Дагын катап кем-херек үүлгедиишкиннеринге удур дээштиг болгаш чогуур хемчеглерни ажылдап кылырынга тодаргай сайгарылга херек – деп, Тываның Баштыңы Владислав Ховалыг айыткан.

Байырлал хүннеринде назы четпээннерниң киржилгези-биле кем-херек үүлгедиглери бүрүткеттинмээнин Тываның Баштыңы демдеглээн.

– Профилактика ажылын шын тургусканындан ол тайылбырлаттынар. Уругларны база элээдилерни бөлгүмнер болгаш спортчу секцияларже хаара туткан. Муниципалитеттерге культурлуг болгаш спортчу хемчеглер арбын эрткен. Албан черлер аразының комиссиялары даңзыда өг-бүлелерни кезип, хыналданы күштелдирген. Кожууннарже үнүүшкүннер үезинде, чазак кежигүннери дыштанып келген сургуулдар-биле ужуражылгаларны эрттирип, ажык чугааны чорутканы, үре-түңнелдиг болган деп санаар мен – деп, Владислав Ховалыг чугаалаан.

Назы четпээннер херектериниң база оларның эргелерин камгалаар талазы-биле комиссиялар даңзызында 1938 өг-бүлени база назы четпээннерни хынаан.