Тываның чонну ажылга хаара тудар төвү 2025 чылда социал керээге үндезилээн күрүне деткимчезиниң программазының түңнелдерин үндүрген. Республиканың 3569 чурттакчызы амыдыралдың берге байдалдарын ажып эртеринге адрестиг дузаны болгаш чаа аргаларны алган.
Өг-бүлелерни деткииринче угланган акша-хөреңгиниң ниити түңү 751 сая ажыг рубль болган. Ол деткимче программазы национал «Өг-бүле» төлевилелдиң езугаар боттанып турар.
Отчеттуг үениң дургузунда 1248 керээни бодунуң херээн эгелеп, хөгжүдеринче чарган. Бизнес угланыышкыннары-биле чергелештир, деткимчениң өске хевирлери хереглелдиг бооп арткан:
- 854 керээ ажылче тургустунарынга дузалаан.
- көдээ ажыл-агыйынга чугула херектиг хууда ажыл-агыйларын хөгжүдеринге 957 керээ чардынган.
- 510 дугуржулга амыдыралдың берге байдалдарын ажып эртер өске-даа хемчеглерни хаара туткан.
«Социал керээге үндезилээн күрүне деткимчези дээрге чүгле материалдыг дузазы эвес-тир. Ол дээрге кижи бүрүзү-биле кады тургузуп турарывыс турум чорукче бот-тускайлаң орук-тур.
Бистиң ажылывыс амыдырап чурттаарының кудуку деңнелинден эвээш орулгалыг билдириишкин киирикчизиниң байдалын ханы сайгарып көөрүнден эгелээр. Бистиң консультантыларывыс ажыл-чорудулга планын тургузарынга, резюме белеткээринге болгаш келир үеде чедимчелиг чугаалажылгаларны чорударынга арга-дуржулга алырын хандырар» – деп, Тывада «Россияда ажыл» кадрлар төвүнүң директору Айлана Бюрбю тайылбырлаан.
Тываның чурттакчылары колдуунда-ла идик-хеп даараар болгаш септээр ательелер, бичежек кафелер, кондитер цехтери, ол ышкаш чараштаныр студиялар болгаш тус черниң продукциязының биче бүдүрүкчүлери дээн ышкаш хууда сайгарлыкчы ажыдып, азы ажыл-биле бот-хандыртынган эрге-байдалды кылдыртып турар. Керээниң негелдези-биле боттарының ажыл-херээн хөгжүдеринге 350 муң рубль чедир акшаны ап болур. Күрүне деткимчези чокта чүгле саазынга артып каап болур бизнес-идеяларны боттандырарынга ол акша-хөреңги дузалаар.
Тывада ук программаның боттандырылгазы амыдырал-чуртталганың деңнелин бедидеринче болгаш хамаатыларның экономиктиг хамаарышпас чоруун деткииринче угланган регионалдыг политиканың эң-не чедимчелиг аргаларының бирээзи болуп арткан.