Тываның Арга-арыг болгаш бойдус яамызының дыңнатканы-биле алырга, 2025 чылдың марттан октябрьга чедир республикага ниитизи-биле 18486,46 гектар черни ээлээн 179 арга-арыг өрттү бүрүткеттинген.
2024 чылга деңнээрге өрттерниң саны 36 санга (17 хуу) эвээжеп, өртке алыскан шөлдүң хемчээли 2,43 катап (26463,20 гектар чедир) кызырылганы – чугула чедиишкиннерниң бирээзи болган.
Онза хайгааралдыг бойдус девискээрлеринге, тодаргайлаарга, «Азас» камгалалдыг чер девискээринге болган үш өрт дөрт гектар шөлдү алганы эрткен чылдың көргүзүүнден элээн эвээш. Арга-арыг фондузунга 53,3 сая рубльдиң экономиктиг когаралын чедирген, ол дээрге 2024 чылда чедирген когаралдан 20 катап эвээш (1,065 млрд. рубль).
Өрттерниң 67,1 хуузунга бойдус халавындан, чижээ, кургаг чаңныктардан өөскээн, а кижиниң буруузундан өртерниң 21,8 хуузу үнген. Бо чылын өске категориялыг черлерге база кызыгаар чоогу черлерге өрттерниң 11,1 хуузу хамааржыр. Бо чайның дургузунда байдалды турум тудар дээш, чамдык кожууннарда онза байдалды чарлап, регионалдыг деңнелге онза байдалды үш катап киирген. Ол үеде 98 өрттү өжүрген. Өрттер өжүреринге федералдыг арга-арыг камгалаар күштерни, ооң иштинде чаъс чагдырарынга ажыглаар самолетту ажыглаан. Кожа-хелбээ регионнардан 293 специалисти хаара туткан.
ТР-ниң Арга-арыг болгаш бойдус курлавырларының яамызы «Ужудукчу чок авиация системалары» национал төлевилели-биле арга-арыгда байдалды дүрген хайгаараарынга «Геоскан 801» деп амгы үениң 16 ужудукчу чок аппарадын алган.
Буруулуг кижилерни тодарадыры-биле шупту өрттерниң дугайында материалдар кирген. Хыналдалар соонда, арга-арыг шөлдерин чок кылып азы хоозуратканы дээш үш кеземче херээн оттурган.
Материалдарның хөй кезиинде (93,3 хуузу) кем-херек үүлгедиишкининиң бадыткалы чок болган.
Араг-арыг болгаш бойдус яамызы өрттерниң шөлүн ам-даа эвээжедир, баштайгы хонуунда өжүрген өрттер үлүүн 69,5 хуу чедир көвүдедир, чон-биле профилактика ажылын күштелдирер сорулгаларны 2026 чылга салган. Муниципалдыг чагырга черлери арга-арыглыг черлер чоогун үезинде аштап-арыглаарын хандырар даалганы алган.