Эт-хөреңги дээш үндүрүглерни үе-шаанда төлээри чугула

Декабрь 1-ге чедир чурттакчы чон эт-хөреңги дээш үндүрүглерин төлээри албан. Чыл санында эртип турар “Бодуңдан эгеле” деп акцияның киржикчилери өске үндүрүг төлекчилеринге үлегер-чижекти көргүзери-биле албан төлээр чыылдаларны хуусаа бетинде бодунуң күзели-биле төлеп эгелээн.

Эрзин кожууннуң чагырга даргазының амыдырал-хандырылга талазы-биле оралакчызы Кежик Седи чаңгыс чер-чурттугларын эт-хөреңги дээш үндүрүглерин хуусаа бетинде төлээринче кыйгырган.

Федералдыг үндүрүг албанының Тыва Республикада эргелели nalog.gov.ru сайтыда “Үндүрүг төлекчизиниң хууда кабинединден” азы gosuslugi.ru “Күрүне ачы-дузазы” порталындан азы үндүрүг органындан чеже акша үндүрүг төлээрин билип ап болурун сагындырып тур. Ол ышкаш тодаргай медээни чаңгыс аай харылзаа-төвүнүң 8-800-222-2222 дугаарлыг халас долгаар телефонундан билип ап болур.