Уруглар бажыңындан үнген соонда күрүнеден алганы социал бажыңнар дээш төлевирден эвээш орулгалыг чурттакчылар деп санаттынып турар өскүстерни хостаан. Тываның Чазаа ук категорияның хамаатыларын квартира төлевириниң ол кезээнден хостаарын шиитпирлээн.
Өскүс уругларга дамчыткан социал чуртталга бажыңнарын хайгаарап турар Тываның Өөредилге яамызы ол чиигелдени саналдап киирген. Тускай мергежилдиглерниң тайылбыры-биле алырга, өскүс уругларның чурттаар оран-савазын ажыглап турарындан көөрге, оларның хөй кезии бот-тускайлаң амыдырап билбес болганындан, коммунал өрелер көвүдеп, чурттаар черин алзып ап болур айыылы улуг.
Республиканың эрге-чагыргазы өскүс уругларны хөлезилел төлевириниң чамдыызындан хостап тура, оларга улуг чуртталгага чаңчыгарының бергелерин ажып эртеринге дузалыг деп санап турар. Өөредилге яамызы ол чиигелде чүгле эвээш орулгалыг өскүс уругларга, а тодаргайлаарга, тускай керээ дугуржулгазы-биле бажың ажыглалының чарыгдалдарынга хамааржырын демдеглээн. Өскүс уруглар коммуналдыг ачы-дуза дээш, чижээ, бок төккени, суг, чылыг, электри энергиязын ажыглааны дээш, бүрүн төлээр. Чаа чиигелде боттарының бюджедин элээн камнап алырынга, өскүс уругларга дузалаар.
Социал чуртталга бажыңнарында чурттап турар өскүс уруглар чиигелдени алыр дизе, муниципалитеттер чагыргазындан бодун азы оларның өг-бүлезин эвээш орулгалыг деп шынзыткан бижикти ТР-ниң Өөредилге яамызынче дужаар. Ол сертификатты муниципалдыг чагыргалар берип турар. Тывада ажылдап шыдаар назылыг хамаатыларның орулгазы амыдырап-чурттаарының доктааттынган кудуку хемчээли – айда 19522 рубльден эвээш болза, эвээш орулгалыг деп санаар.