Эъжимниң тевелеринге тарылганы салып, мал кыштаглаашкынын хынаан

Улуг-Хем кожууннуң көдээ ажыл-агый эргелелиниң удуртукчузу Болат Ховалыгның дыңнатканы-биле алырга, мал кыштаглаашкыны чогумчалыг эртип турар.

Көдээ ажыл-агый эргелелиниң ажылдакчылары, мал эмчилери, сумулар чагырга черлериниң ажылдакчылары кожууннуң 29 кыштаанче үнүүшкүннү кылганын чагырга чери дыңнаткан.

Харның кылыны аңгы-аңгы, чамдык кыштагларда 30, тайга эдээнде кыштагларда 35 сантиметр. Агаар чылыг болганы-биле малчыннарга, мал-маганга таарымчалыг. Бир кыштагда мал оолдаашкыны эгелей берген, кажаалары чылыг, мал чеми четчир.

Көдээ ажыл-агыйның удуртулгазы малга немелде чем кылдыр 27 шоодай тарааны болгаш чарбаны малчыннарга үлээн. Кыштагларже оруктарны үргүлчү далбыйлап, харын аштап турар.

Кожууннуң мал эмчилери Начын Хойлапай, Айдыс Маадыр-оол, Аяс Дөнен Эъжимде теве кадарчызы Сергек Мижит-Доржунуң тевелеринге кодурга удур тарылганы салган.

Тевелер кышты хүр-менди ажып, хостуг одарлап турар-даа болза, малга сигенни, дусту, немелде чем кылдыр тараа, чарбаны база берип турар.