Тываның Баштыңы Владислав Ховалыг республиканың оруктарында эзирик чолаачыларны илередири-биле хыналдаларны чорудар даалганы орук шимчээшкининиң айыыл чок чоруунуң күрүне инспекциязынга берген. Өлүм-чидимниг орук озал-ондактарының көвүдээни аңаа чылдагаан болган.
ТР-ниң Иштики херектер яамызының медээзи-биле алырга, эрткен неделяда орук озал-ондаанга алды кижи амы-тынындан чарылган. Эзирик чолаачыларның буруузу-биле болган айыыл-халаптар чүгле кемдээшкин-биле эвес, а чамдыкта өлүм-чидим-биле төнери харааданчыг. Озал-ондак сан-фактыларында чадаг кижилер-биле айыыл-халаптар саны көвүдээнин демдеглээри чугула.
Республиканың Орук шимчээшкининиң айыыл чок чоруунуң күрүне инспекциязының медээзи-биле алырга, 2025 чылдың 5 айында республика девискээринде бүрүткеттинген орук озал-ондактарының саны эрткен чылдың ол үезинге деңнээрге 1,5 катап хөй болган – 158-тен 232 четкен. Оон чок болган кижилер саны – 25-тен 30 четкен. Орук озал-ондаанга берттинип кемдээн кижилер саны 40 хуу көвүдеп, 86 кижи турган болза, ам 304 кижи болган. Шупту болуушкуннарның хөй кезии республиканың найысылалы Кызылга болганы демдеглеттинген.