Чеди-Хөл кожууннуң төп үлегер-майыктың ном саңының ажылдакчылары Адалар хүнү таварыштыр Хову-Аксында техникумнуң сургуулдарынга болгаш улуг класстарның өөреникчилеринге “Эзирниң күжү – чүүнде, эрниң күжү – билиинде” деп ажык чугааны эттиргенин ном саңы дыңнаткан.
Библиотекарьлар өгбелерниң байлак дуржулгазынга даянмышаан, улустуң аас чогаалы, үлегер домактары, езу-чаңчылдары, тоолдарның база чечен чогаалдарның маадырлары таварыштыр өзүп орар салгалга келир үеде чурттунуң мөзүлүг, төлептиг кижилер, адалар болурунче угландырган кижизидилге ажылын чоруткан.
Байырлыг хемчегни Чеди-Хөл кожууннуң болгаш Хову-Аксы сумузунуң Адалар чөвүлелдериниң даргалары Сылдыс Куулар биле Хүреш-оол Куулар чагыг сөстүг ажыткан.
Чеди-Хөл кожууннуң 12 дугаар полиция салбырының даргазы Меңги Чүльдүм, КАИ салбырының даргазы Владислав Натпит-оол база полиция даргазының истелге килдизиниң түр үеде оралакчызы Алдынай Тойбу-Хаа оолдарга корум-чурум талазы-биле база интернет четкиде шын-меге болгаш мегечи бузурукчулар дугайында медээлерни дыңнадып, багай чүүлдерге алыспазын сүмелевишаан, эки өөренирин база амыдыралынга шын шилилгелиг болурун суртаалдаан.
“Таңды-Уула” уран чүүл чериниң ыраажызы Адыгжы Намчыл-оол “Ачай” деп ыры-биле хемчегни каастаан.
Ном саңының коллективи Адалар чөвүлелиниң даргалары, корум-чурум хайгааракчылары шагдааларга, техникумнуң болгаш ортумак школаның башкыларынга демниг болгаш сырый кады ажылдажылга дээш четтиргенин илереткен.
Ном кижиниң өңнүү, дузалакчызы, сүмелекчизи, эртем-билигже алдын дүлгүүрү. Библиотекарьлар чурт-шинчилел килдизинде тыва маадырлыг тоолдарны, чечен чогаалдарны, езу-чаңчылдарны номчуурунче кыйгырган.
Номнар таварыштыр өгбелеривис эр мөзү-бүдүш кижизидилгезинче ажыглап чораан дуржулгазын эр салгалдарга, тыва эр кижиниң овур-хевири улустуң аас-чогаалы, ылаңгыя эпостарда (тыва маадырлыг тоолдарда) шыгжап, дамчыдып арттырганнар.
