Фронтуже аъттаныпкан солдаттарывыстың алдар-адын утпазы чугула

Сталинград тулчуушкунунга немец-фашисчи дайзыннарны совет шериглерниң чылча шапканының төөгүлүг хүнүн бүгү чурт демдеглээн. Сталинград тулчуушкунунга тиилелгениң 80 чылынга тураскааткан сактыышкын хемчеглери Тывага эрткен.

Тываның Баштыңы Владислав Ховалыг Тыва Арат Республикадан фронтуже аъттанган солдаттарывыстың ол улуг тулчуушкунга киришкенин сагындырып, бистиң чонувустуң эң шыдамык болгаш күштүг тура-соруун демдеглээн.

– Тулчуушкунга бистиң өгбе чаңгыс чер-чурттугларывыс, ССРЭ-ниң хамаатылары Сажин биле Горбунов алышкылар, Давыдов, Тутатчиков, Сотников, Кудрявцев, Мурыгин, Пoпoв, Савельев, Лебедев, Агапов, Катцын, Абрамов, Потылицын, Фунтиков, Гончаров, Туганаев, Казанцев, Архипов, Егоров, Галактионов болгаш оон-даа өске фронтуже аъттаныпкан солдаттарывыстың алдар-адын утпайн, өзүп олурар элээдилер болгаш аныяктарның сактып чорууру чугула – деп, Тываның Баштыңы бижээн.

Республикага төөгүлүг хүнге тураскааткан ада-чуртчу хемчеглер эрткен. В. Көк-оол аттыг национал хөгжүм-шии театры февраль 24-те «Даң хаяазы мында ыржым» деп шиини бараалгадыр.

Ийи чүс хүн-дүн дургузунда Сталинградты бүзээлээни эң ханныг болгаш каржызы-биле төөгүде демдеглеттинген. Хоорайны камгалап тура, чартык сая совет солдаттар болгаш офицерлер бажын салган болгаш балыгланган.

Делегейниң ийиги дайынында эң-не улуг шериг тулчуушкуну болур Сталинград тулчуушкуну немец шериглерниң стратегтиг эгелекчи саналын буураткан. Совет чон болгаш Кызыл Шеригниң дайынчылары тиилелгени чедип алган.

Волгоград хоорайда, маадырлыг эрткен үе-биле харылзаалыг дыка хөй төөгүлүг черлер Сталинград тулчуушкунун сагындырып турар. Мамаев Курганында «Ие-чурт кыйгыртып тур!» деп Сталинградтың камглакчыларын мөңгежиткен канчаар-даа аажок улуг тураскаал бүгү делегейде сурагжаан.