Өг-бүлелерни деткиир чаа хемчег – чаңгыс аай пособие

Россияның Социал фондузунуң Тывада салбырынче иштиг херээжен чонну база 17 хар чедир назылыг ажы-төлдүг өг-бүлелерни деткиир чаа хемчег – чаңгыс аай пособиеже Тывада ийи муң ажыг кижи билдириишкинни кирген. Россияның дөрт чаа субъектизи-биле кады шупту регионнардан өг-бүлелер күрүне ачы-дузазының порталы таварыштыр төлевирже билдириишкиннерни 2022 чылдың декабрь 28-тен долдуруп эгелээн.

Он чеди харга чедир назылыг сая хире уругларга база 32 муң хире иштиг херээженнерге дээш чаңгыс аай пособиеже билдириишкиннер 2023 чылдың январь 7-ге чедир киргенин Социал фонд дыңнаткан. Социал фондунуң Тывада салбыры январь 3-те билдириишкиннерни көрүп эгелээн. Январь 4-те фонд пособие талазы-биле айтырыгларлыг ада-иелерниң боттарын хүлээген.

Оон аңгыда, үш харга чедир дун чаштыг ада-иелерден пособие тыпсырынга билдириишкиннер кирген. Ам ол төлевирни чаа дүрүм-биле доктаадып, чаңгыс аай пособиеде каткан. Бир эвес 2023 чылга чедир өг-бүледе чаш уруг төрүттүнген болза, ада-ие ооң мурнундагы негелде-биле төлевирже киирип болур. Азы, өг-бүлениң эт-хөреңгизин көрбейн база хөй орулгалыын санавайн (чаңгыс аай пособиени тыпсырда амыдырап-чурттаарының кудуку хемчээлин чаңгыс кижиге эвес, а ийи кижиге кылдыр). Он чеди муң хире ада-ие дун төлүнге төлевирни эрги чурум-биле санаар кылдыр киирген.

Чаңгыс аай пособие ооң мурнунда турган беш аңгы деткимче хемчээн солаан. Ол дээрге бирги болгаш үшкү төлүнге ай санының төлевирлери, үштен сес харга чедир база 8 хардан 17 харга чедир ай санының ийи төлевири, иштиг дээш ай санының төлевири-дир.

Чаа пособиени кижи санынга регионда амыдырап-чурттаарының кудуку хемчээлинден эвээш орулгалыг өг-бүлелерге тыпсыр. Ада-иелер база уруглар российжи хамаатылар база Россияда доктаамал чурттап турар ужурлуг. Төлевирни томуйлаарда, өг-бүлениң орулгаларынга база эт-хөреңгизинге компелекстиг үнелелди берип, ада-иениң ажылдап турарын база көөр.