Улуг-Хем кожууннуң девискээринге «Өг-бүле шыгжамыры» төлевилелин амыдыралда херек кырында боттандырар дээш, кожуун чагыргазы, херээженнер чөвүлели чонну картофель, ногаа аймаан тарыырынче кыйгырып, өг-бүлелер аразынга мөөрейни чарлаанын чагырга чери дыңнаткан.
Бо чылын база ногаажылар мөөрейге улуг-хемчилер идепкейлиг киржип, боттарының бажыңының девискээрин чонга интернет четкизинге таныштырып көргүскен. "Өг-бүлениң шыгжамыры" төлевилелге даянып эрттирген мөөрейниң тиилекчилеринге шаңнал-макталдарны күскү дүжүт ярмарказының үезинде байырлыг байдалда тывыскан.
Ол ышкаш кожуунда тараачын арат ажыл-агыйлыглар картофельди хөйү-биле тарып, бо хүннерде дүжүдүн ажаап турар.
Тускай шериг операциязының киржикчилериниң өг-бүлелеринге, социал берге байдалда өг-бүлелерге халас картофель дузаламчызын чедирери-биле А.А. Дамдынай 2,5 гектар черге «ийиги хлебти» тарааш, дүжүдүн ажаап алгаш, үстүнде айыттынган чонга үлээри-биле шоодайларда белеткээш эккелген.
Изиг-кааң чай болган-даа болза, дазыл-чемиш дүжүдү багай эвес болзун дээш араттар кызып ажылдаанының түңнелинде, чонга дузаламчы чедиртинген.