Өгбелерден дамчып келген сыгыт-хөөмейни школачыларга бараалгаткан

Тыва үндезин культура төвүнүң ажылдакчылары Шагаан-Арыг хоорайның 1 биле 2 дугаар школаларынга аалдап чедип, «Уран дарган» мөөрейиниң бир кезээ кылдыр өөреникчилерге Тываның улустуң дарганы Кенин Күдүш-оолович Саттың дугайында тырттырган «Дарган» деп документалдыг кинону көргүскенин төп дыңнаткан.

Улуг, күчүлүг Эне-Сайның ырызын «Тыва» бөлүүнүң хөгжүмчүлери бараалгадырга, уруглар ырының утказынче ханы кирип, кичээнгейлиг дыңнап органнар.

Өгбелеривистен дамчып келген сыгыт-хөөмей залга орган оолдар, уругларның сеткилин ажыдып, онзагай чараш хевирлери-биле оларның кичээнгейин хаара туткан. Шак бо культурлуг солун хемчег уругларга ажыктыг болгаш үндезин культураны ханы билип өөренип алырынга улуг ажык-дузалыг.