Тывада грипп болгаш респираторлуг вирус халдавырынга удур коллективтиг иммунитетти тургузары-биле тарыышкынче чонну хөйү-биле хаара тудар кампания эгелээн. Ону чедип алыр дизе, республиканың чурттакчы чонунуң 60 хире хуузунга тарылганы кылыры чугула.
Гриппке удур тарылганы мурнады салыр бөлүктеринге бичии уруглар, улуг назылыг база хоочураан аарыг кижилер хамааржыр. Эмнерни республиканың эмнелге албан черлеринче тарадыр үлээн. Арткан кезээ октябрь-ноябрь айларда кээр. Оон аңгыда республика чаа коронавирус халдавырының эпидемиологтуг байдалы нарыыдаар болза, аңаа удур вакциналарны садып алыр. Амдыызында Covid-19 талазы-биле республикада байдалы ажырбас.
Сезоннуг грипптиң нептерээрин болдурбас кол арга – аңаа удур тарылга дээрзин сагындыраал. Специалистер арыг-силигни сагыырын сүмелеп турар: холдарны үргүлчү саваңнап чуур, техниктиг херекселдерни дезинфекциялыг чүүлдер-биле аштаар база хөй-ниити черлеринге камгалал маскаларны кедер. Ылаңгыя агаар өскерлип турар үелерде, эң-не “хээрек” кижилер – чаштар болгаш кадыкшылы кошкак кижилерниң үеге таарыштыр кеттинири чугула.
