Грипп халдавырынга удур тарылга планы ажыр күүсеттинген

Ноябрьның 18-тиң хүнү-биле алырга, Тывада 205,4 муң кижи, азы планнаанындан үш муң кижи хөйге гриппке удур тарыткан.

Росхереглелхайгааралдың Тыва Республика талазы-биле эргелелиниң удуртукчузу Людмила Салчак гриппке удур тарылганың түңнелдерин Тываның Баштыңы Владислав Ховалыгга илеткээн. 2024 чылдың иммунизация планы 101,7 хуу күүсеттинген.

Халдавырның кол нептередикчилери деп санаттынар 92,8 муң уругну тараан. Олар тарыткан улустуң 45 хуузу болган. Артканнары – улуг улус. Халдавырдан эң кол камгалал болур коллективтиг иммунитетти тургузарынга эргежок чугула көргүзүг – Тываның чурттакчы чонунуң 60,9 хуузу амгы үеде тарыткан.

Ынчангаш специалистер грипп талазы-биле бо хүнде дүвүревейн турар. Эрткен неделяда республикага чоруткан мониторингиден алырга, респираторлуг вирустуг халдавыр болгаш грипптен аараан 490 таварылга бүрүткеттинген. Ооң мурнунда неделяга деңнээрге, аарыыр чорук 7,9 хуу немешкен-даа болза, эпидемилогтуг деңнелден каш-каш катап эвээш.

Кожууннарда тарылга кампаниязы уламчылавышаан болгаш, гриппке удур тарыткан кижилер саны ам-даа көвүдээри чугаажок. Вакцина ам-даа артып каан Кызыл, Тожу, Чаа-Хөл, Тере-Хөл база Улуг-Хем кожууннарда гриппке удур тарылга ам-даа чоруп турар.