Улуг-Хем кожууннуң Чааты школазында тускай шериг операциязының киржикчизи, гвардияның биче сержантызы Бады Тулуштуң чырык адын мөңгежидип, «Маадырның партазын» ажыткан.
Б.В. Тулуш 2022 чылдың март айда дайынчы хөделиишкиннер девискээринче чорупкан турган. Маадыр бодунуң берген даңгыраанга төнчүзүнге чедир шынчы болуп, дайын шөлүнге шериг хүлээлгезин сыныш чок күүсеткеш, амы-тынындан чарылган.
Маадырның чоок кижилери – авазы Тамара Чамбаловна, өөнүң ишти Кристина Тулуш, дөргүл-төрели, чагырга чериниң болгаш школаның удуртулгазы чыглып, Бады Тулуштуң дугайында чылыг сактыышкыннары-биле үлешкен. Школачылар, чалыы армейжилер ада-чуртчу ыры-шүлүктерин бараалгаткан.
Эр болгаш херээжен улус аразынга хол бөмбүүнүң маргылдаазынга Улуг-Хем биле Чаа-Хөл кожууннарның спортчулары киришкен. Маадырның өөнүң ишти, хемчегниң эрттирикчизи тиилекчилерни шаңнап-мактаан.
Эр улус аразынга бирги черни Торгалыгның (100 000 рубль), ийиги черни Эйлиг-Хемниң (70 000 рубль), үшкү черни Улуг-Хемниң (50 000 рубль), дөрткү черни Арыг-Үзүүнүң (30 000 рубль) командалары тус-тузунда чаалап алган. «Тергиин камгалакчы» – Айдаш Сержикпей, «Тергиин көдүрүкчү» – Мөңге Доржукай, «Тергиин халдакчы» – Сайын Хуурак, «Бүгү талазы-биле дески ойнакчы» – Сырбык Маспын-оол.
Херээжен улус аразынга бирги черге Эйлиг-Хемниң (100 000 рубль), ийиги черге Хендергениң (70 000 рубль), үшкү черге Хайыраканның (50 000 рубль), дөрткү черге Шагаан-Арыгның (30 000 рубль) командалары төлептиг болган. «Тергиин камгалакчы» – Азияна Намдал, «Тергиин көдүрүкчү» – Айдана Монгуш, «Тергиин халдакчы» – Айдана Хомушку, «Бүгү талазы-биле дески ойнакчы» – Мергенмаа Саая.
Чыылган чон дайынчының кижизиг, дузааргак, ажылгыр, чазык аажы-чаңныг турганын сактып турган.
Бады Тулуштуң өөнүң ишти Бии-Хемниң Аржаан сумузундан. Кристина Тулуш ийи чаш уруу-биле арткан. Аржаанчыларга маадыр күдээзиниң чырык ады кезээ мөңгеде сактыышкын болуп артар.