“Улусчу картофель” төлевилелиниң Кунгуртундан киржикчилери –
Арат биле Чечек Хертектерниң беш ажы-төлдүг өг-бүлези. Оларның тарып олурткан “ийиги хлеви” элээн өскен. Огородунда свекла, морковь, салат болгаш укропту немей тарып алган. Уруглары картофель, ногаазын чашпаннап, суггарып, ада-иезинге дузалажып турарлар.
Хөй ажы-төлдүг өг-бүле 2016 чылда “Инек – чемгерикчи малым” төлевилели-биле бызаалыг инекти база алган. Малының баш саны немежип өскен. Чемгерикчи инээниң сүдүнден кадык, тарак, өремени кылып ап турар. Ол ышкаш “Социал керээ” төлевилелге киришкеш, хууда ажыл-херээн база ажытканнар. Күрүне деткимчези-биле демир каңнаарынга херек дериг-херекселди, камгалал хепти садып алган. Чагыглар доктаамал кээп турар. Хертектер социал деткимче – оттулар ыяшты база чылдың-на алыр.
Өгнүң эр ээзи чылгы мал база тудуп турар. Ол аңнаар, балыктаарынга ынак. Өг-бүлениң ынак чеми – балык эъдинден перемячи. “Калбак балыктың казырыын аштааш, эъдин кежи-биле тырттып алгаш, согуна холуур. Далганны хөөдүп алыр. Чаа быжырган перемячилерни уругларым дораан арыдыптарлар” – деп, өгнүң кыс ээзи рецептизи-биле үлешти.
Күрүне деткимчезиниң ачызында бо өг-бүле малдыг-даа, картофельдиг-даа, оттулар ыяштыг-даа, ажыл-херектиг-даа апарган.
Хертектерниң уруглары бажыңындан ырак эвесте тургускан уруглар ойнаар шөлчүгеште хостуг үезин эрттирип турар.
Чуруктарны Шончалай Ховалыг тырттырган
