Каа-Хем суурдан Айлана Докуй социал керээге үндезилээн күрүне деткимчезиниң ачызында күзелин амыдыралда боттандырганын чагырга чери дыңнаткан.
Байыр-найырның чигирзиг чеми – торт. Айлана Докуй торттарны чогаадыкчы каастап эгелээрге, дизайнер-даа апаар, хөй каът торттарны быжыглап тургузуп эгелээрге, архитектор-даа апаар, кисточказын тудупкаш, овур-хевирлерни каастап эгелээрге, чурукчу-даа апаар.
Өгнүң кыс ээзи бичиизинден тура амданныг аъш-чем кылырынга сонуургалдыг турган. Бирги тортун 2018 чылда уругларынга быжырып берген. Оон чигирзиг чемнер белеткээриниң чажыттарынга өөренип алган.
Сайгарлыкчы ава ынак ижин кылып, чагыдып алыкчының күзели-биле кандыг-даа хевирлерни чогаадып, мастикадан сиилбип кылыр. Арга-дуржулгазы бедээн кондитер амгы үеде боду өскелерни өөредип, мастер-класстарны эрттирип турар апарган.
Айлана Докуй амданныг аъш-чем кылырындан аңгыда, стол теннизинге база багай эвес ойнаар. Ол өөнүң ээзиниң ынак эжи, ажы-төлүнүң сагыш човангыр иези. Найыралдыг өг-бүле беш ажы-төлдүг, бичиизи чаа-ла ийи айлыг. Олар кезээде бот-боттарын деткижип чоруурлар.
Куда-дой, төрүттүнген хүннер болгаш өске-даа байырлалдар сумунуң ажыл-биле бот-хандыртынган сайгарлыкчыларының бирээзи – Айлана Докуйнуң торттары чокка эртпес.
