Хөй-ниитижи эне бүдүн хап чүңнү дамчыткан

Иштии-Хемниң авалары тускай шериг операциязында киржип турар камгалакчы оолдарга чылыг чүң уктарны чорудары-биле аргып турарын чагырга чери дыңнаткан.

Иштии-хемчилер хуралдааш, тускай шериг операциязында оолдарга чылыг уктар аргыыр, камгаланып шыптынар четкилер кылыр эки турачылар штабын тургузуп алганнар. Көдээ клубта чыглып алган авалар чүң уктарны аргып кирипкен, адалар четки херер ыяш раманы кылганнар.

Сумунуң 81 харлыг улуг назылыг энези Марта Ховалыговна Данзын-Нава хой дүгүн чугган соонда, дыткаш, ээрген. Ол бүдүн хап чүңнү бодунуң өмүнээзинден штабка эккеп берген.

Хоочун олут орбас, чыдын чытпас эрес-кежээ кырган-ава. Ооң назы-хары улгаткан-даа болза, тайгадан кат, мөөгү чыып, болбаазырадып алыр чаңчылдыг. Эне көдээ ажыл-агый делгелгелериниң доктаамал киржикчизи. Ол сумунуң хөй-ниити ажылындан черле чыда калбас.

Кижи бүрүзү тиилелгени чоокшулаштырар дээш үлүг-хуузун киирип болур, ынчангаш күзелдиг улус шыдаар шаа-биле ачы-дузазын көргүзер аргалыг.