Хөмүр-даш чедирилгези үзүктелиишкин чок

Өвүр кожууннуң чагырга даргазының хүлээлгезин күүседип турар Айдыс Кууларның дыңнадып турары-биле алырга, Хандагайтының оттулар чүүл шыгжамырында хөмүр-дашты үзүктел чок дүжүрүп турар.

– Хандагайтының оттулар чүүл шыгжамырында бо хүнде 316 тонна хөмүр-даш бар. Бир тоннада өртээ – 3001 рубль, чедирилгези дээш аңгы төлевирлиг болур.

Бо хүнге чедир кожуунувустуң сумуларынга чонга садар хөмүр чедирилгези бергедеп турган болза, ам «Транспорт сервизи болгаш төлевилел» күрүнениң унитарлыг бүдүрүлгези «кара алдынны» дорт чедирип эгелээн. Сумуларның чагырга черлеринде чонга садар хөмүрнү ниитизи-биле 35 тонналап чедирген. Бо талазы-биле ажыл уламчылаар.

Тываның Тарифтер талазы-биле албан чериниң санааны-биле суму бүрүзүнге бир тоннада хөмүр өртээ ангы-ангы болур. Саглы – 3271 рубль, Сарыг-Хөл – 3726 рубль, Чаа-Суур – 3335 рубль, Дус-Даг – 3289 рубль, Солчур – 2990 рубль. Бо дээрге чедирилге чок, чүгле хөмүрнүң өртээ болуп турар – деп, Айдыс Куулар соцчеткилерде бижээн.

Өвүр кожууннуң чурттакчы чонун хөмүр-даш-биле хандырып, эптиг байдалдарны тургузар дээш тус черниң чагыргазы регионнуң Одалга болгаш энергетика база Чуртталга-коммунал ажыл-агый яамылары, «Транспорт сервизи болгаш төлевилел» күрүнениң унитарлыг бүдүрүлгезиниң удуртукчулары-биле сырый харылзаалыг ажылдап турар.