Бай-Тайга кожууннуң Шуй сумузунга «Хүнчүгеш» уруглар садының тургустунганындан бээр 60 чыл оюнга тураскааткан байырлыг хемчег болуп эрткенин чагырга чери дыңнаткан.
Уруглар садының чаштары солун концерт программазы-биле байырлалды ажыткан. Школа назыны чептээн уруглар өөредир албан чериниң аңгы-аңгы чылдарда доозукчулары, хоочун башкылар, кожууннуң уруглар садтарының эргелекчилери чыглып келген.
«Хүнчүгеш» уруглар сады 1966 чылда ажыттынган. Баштайгы удуртукчулары – Зинаида Адыг-ооловна Аптыы, Дамбы Былак Иргитовна. Амгы үеде уруглар садын Долаана Шойдан удуртуп турар.
Бай-Тайга кожууннуң баштыңы Роберт Аракчаа байыр чедирип, шылгараннарга ТР-ниң Дээди Хуралының шаңнал бижиктерин, «Бай-Тайга кожууннуң улус өөредилгезиниң алдарлыг ажылдакчызы» деп бедик аттарның херечилелдерин Елизавета Домбаштайга, Күнзенмаа Доскаарга, Вера Конгарга, Светлана Сугеге тывыскан.
ТР-ниң Өөредилге яамызының хүндүлүг бижиин уруглар садының таңныылы Альберт Хомушкуга тывыскан.
Бай-Тайга кожууннуң удуртулгазы «Хүнчүгештиң» коллективинге 300 000 рубльдиң дериг-херекселин (уруглар ойнаар шөлчүгешке) дамчыткан.
