Хөнделең школазынга «Өзүлдениң демдээ» төвү ажыттынар

Барыын-Хемчик кожууннуң Хөнделең сумузунуң школазында 40 хире уруг өөренип турар. Чаа өөредилге чылында оолдар болгаш уруглар «Өөредилге» национал төлевилелдиң чорудуу-биле «Өзүлдениң демдээ» деп бойдус-эртемниг, техниктиг, ниитилел база чурагайлыг угланыышкынныг билиг бээр төпке өөренирин ТР-ниң Өөредилге яамызы дыңнаткан.

Беш чүс кижиден көвүдевес эвээш чурттакчылыг бичии суурга ол база бир бурунгаар базым, хөгжүлде болур. Ол ышкаш башкылар өөредилгеге амгы үениң аргаларын ажыглап, билигниң шынарын бедидерлер.

– Бистиң бичии школавыска «Өзүлдениң демдээ» төптү ажыдып, амгы үениң чаа дериг-херекселдерин ап турары өөрүнчүг. Ооң ачызында уругларның кичээлден дашкаар ажыл-чорудулгазын чүүл-бүрү кылдыр эрттирип, башкылар өөредилгениң чаа хевиринче кирер аргалыг апарган. Башкылар төпке уруг бүрүзүнүң сайзыралын экижидер дээрзинге бүзүрелим улуг. «Өзүлдениң демдээ» төптүң класстарын белеткеп алган бис, бо чоокку үеде дериг-херекселин салыр – деп, школаның директору Валентина Кенден-оол демдеглээн.

Ниитизи-биле регионга бо чылын 16 төптү ажыдар. Амгы үеде Тывада «Өөредилге» национал төлевилел езугаар 128 төп тургустунган, бо чылдың сентябрь айда 144 чедер.