Сүт-Хөл кожууннуң Алдан-Маадыр сумузунга суггатчылар аразынга хүүрек сыптаар мөөрей болуп эрткенин сумунуң чагырга даргазы Арбак Ооржак @tmgnews17 дыңнаткан.
Киржикчилер комиссия мурнунга кезип алган ыяжын чазааш, хүүрээн сыптаан. Ук мөөрейниң декикчилери Сүт-Хөл кожууннуң база Алдан-Маадыр сумузунуң чагырга черлери.
– Хүүрек сыптаар мөөрей он бир чыл уламчылап турары бо. Ону бистиң чаңгыс чер-чурттуувус Алик Кертик-оолович суггачыларның хей-адын көдүрери-биле эгелээн турган. Тиилекчилерниң шаңналдары – узун уннуг суг идиктер.
Тергиидеп үнген суггатчылар алган ажыктыг «шаңналдарын» кедип алгаш, улаштыр чымыштыг ажылынче шымныгып кириптер. Бо байырлал дээрге часкы хову ажылдары эгелээниниң албан езузу-биле ажыттынганын чарлааны болур – деп, Арбак Ооржак чугаалап турар.
Бо удаада бирги черни Мерген-оол Ондар (Үстүү-Хову), ийиги черни Мөңгүн-оол Сарыглар (Үстүү-Хову), үшкү черни Макар Ондар (Ыйгылак) олар ээлээн.
Алдан-маадыржылар майның дыштаныр хүннерин хилис эрттирбейн, часкы хову ажылдарынче шымныгып кирипкени ол.
