Хакасияга Шагаа байырлалын бир дугаар демдеглээн

Красноярск край, Хакас Республика база Тыва Республиканың девискээринде регионнарның социал-экономиктиг хөгжүлдезинче угланган “Енисей Сибири” комплекстиг инвестиция төлевилелдиң чорудуу-биле, Хакасияның төвү Абаканга тыва чоннуң Шагаа байырлалын бир дугаар демдеглеп эрттирген.

Абаканда С.П. Кадышев аттыг национал улусчу чогаадылга төвүнге Шагаа байырлалынга сонуургал улуг болганын. Тываның болгаш Хакасияның ус-шеверлериниң национал суй-белектериниң ярмарка-садыглаашкынындан сонуурганчыг чүнү-даа тып ап болур. Ийи республиканың уран чүүл ус-шеверлериниң концерти, национал хептер көрүлдези хөйнүң кичээнгейин хаара туткан.

Тыва аас чогаалынга: дүрген чугаага, узун тынышка, кожамыктарга, үлегер домактар ыдарынга мөөрейлер байырлалды ажыткан. Тыва оюннар маргылдаазы, уругларның чураан чуруктарынга мөөрейлер кымны-даа тоомча чок арттырбаан.

ТР-ниң Чазак Даргазының оралакчызы Уран-оол Ондар чыылган чонга байырын чедирип, бо чараш чаңчыл ам-даа уламчылаарынга идегелин илереткен. Хакасияда сес муң ажыг бистиң чаңгыс чер-чурттугларывыс чурттап турар-даа болза, тыва чоннуң Шагаа байырлалын республика деңнелинде бир дугаар демдеглээннер. Тывада чарлаттынган Чоннуң чаңгыс эп-сеткилиниң чылында хемчегни эрттирип турары улуг ужур-уткалыг.

Хакас Республиканың Баштыңының – Чазааның Даргазының бирги оралакчызы Татьяна Курбатова, территориалдыг болгаш регион политиказының сайыды Лев Сафьянов база культура сайыды Светлана Окольникова чыылганнарга байыр чедирген.

Тываның национал ыры-самның “Саяннар” ансамбли, «Тыва» аас чогаал ансамбли, «Эдегей» танцы болгаш костюм театры, «Алаш», «Чиргилчин», «Одучу» база «Khoomei Beat» хөгжүм коллективтери байырлалдың концертин каастаан.

С.П. Кадышев аттыг национал улусчу чогаадылга төвүнүң солистери – Тываның улустуң артизи Альберт Кувезин, Россияның улусчу чогаадылгазының алдарлыг коллективи «Час ханат» уругларның эстрада студиязы база Хакасияның улусчу чогаадылгазының алдарлыг коллективи «Айас» уругларның хореография студиязы чогаадыкчы байыр чедириишкиннерин бараалгаткан.

Төптүң улуг залынга, Тыва хөөмей мастерлериниң “Хөөмей симфониязы” этниктиг хөгжүмнүң база Хакасияның В.Г. Чаптыков аттыг республика филармониязының симфониктиг оркестриниң концерти-биле байырлал доозулган.