Тываның Баштыңы Владислав Ховалыг «Оргэнерготудуг» институт» АН-ның чаа чиңгине удуртукчузу Герман Кокосадзе-биле ужурашкан. Компания «Роскызыгаартудуг» ФККА-биле «Хандагайты» автомобиль эрттирилге пункткзун эде тудар күрүне керээзиниң чиңгине тудугжузу болуп турар.
Россия биле Моолдуң чазактары 2006 чылда-ла “Хандагайты-Боршоо” кызыгаар эрттирилге пунктузунуң эрге-байдалын өскертир дугайында шиитпирни хүлээп алган турганын сагындыраал. Чүгле Моол биле Россиядан эвес, а үшкү чурттардан кижилерге, машиналарга болгаш чүък сөөртүлгезинге ажыдар сорулга-биле, ол ийи талалыг чурумдан хөй талалыг чурумче шилчиир ужурлуг.
Хөй талалыг чурумну хандырар дээш, ийи тала кызыгаар инфрастургузуун катап тургузарын планнаан. Кижилер болгаш чүък аргыжылгазының шимчээшкини каш катап көвүдээринден, немелде хыналда пунктуларын – шыгжамырлар болгаш ажылдаар оран-савалардан эгелээш, электри дузалал станцияларынга болгаш транспорт тургузар черлерге чедир бүгү-ле инженер хандырылга объектилерлиг чаа каайлы-логистика терминалдарын тудуп, дериг-херекселдер-биле хандырар ужурлуг.
«Россия Федерациязының күрүне кызыгаары» деп федералдыг тускай сорулгалыг программа күүселдези-биле Россия Федерациязының Транспорт яамызы болгаш ооң удуртулгазында «Роскызыгаартудуг» ФККА тудуг ажылдарын чорудуп турар. Төлевилелди боттандырып турда, ону доозарының хуусаалары янзы-бүрү чылдагааннар-биле чаңгыс эвес удаа соңгаарлаттынган. Бо айтырыгны аңгы-аңгы ажылчын ужуражылгаларга, ол ышкаш федералдыг деңнелге чаңгыс эвес удаа көдүрген. Август айда Россияның транспорт сайыды Андрей Сергевич Никитин-биле ужуражылга үезинде, «Роскызыгаартудуг» ФККА бүгү ажылдарны 2026 чылда доозуптарын аазаан» – деп, Владислав Ховалыг бодунуң блогунда үлешкен.
2025 чылдың август айда байдал-биле алырга, «Хандагайты» автомобиль эрттирилге пунктузунга тудуг ажылдары 50 хире хуу кылдынганын Герман Кокосадзе чугаалаан. Кол болгаш дузалал тудуглар туттунган, суг хандырылга болгаш канализация четкилерин шөйген, аар чүък килдээр деңзилерни эптээн, амгы үеде инженер четкилерин, электри шугумун болгаш харылзаа системаларын тургузуп турар.
Хандагайты эрттирилге пунктузу хөй талалыг чурум-биле ажылдап эгелээри – Тыва Республика таварты Сибирь-биле Моол болгаш Кыдатты харылзаштырар транспорт коридорун тургузарынга кол рольду ойнаар. Чаартынган кызыгаар эрттирилге пунктузу таварты амгы хүнден 2 катап хөй машиналар база 4 катап хөй кижилер, азы хүнде 200 хире машина болгаш 1300 ажыг кижи эртер аргалыг апаар.