Хар чагганындан, мал кыштаглаашкыны элээн нарыыдаан

Тывага эрткен неделяның эгезинде хар чагганындан, мал кыштаглаашкыны элээн нарыыдаан. Чамдык кожууннарның одарларында харның кыры дошталдыр доңа бергенинден, малчыннар малды тургуза азырап кирипкен болгаш, мал чеминге хереглел улгаткан деп, республиканың Көдээ ажыл-агый болгаш аъш-чем яамызы дыңнаткан.

Чүгле Эрзин кожуундан безин «Бай-Хөл», «Мандала» көдээ ажыл-агый кооперативинден аңгыда, 17 ажыл-агый чагырга черинче дилегни киирген. Амгы үеде ажыл-агыйларда мал оолдаашкыны кидин түлүк чоруп турарындан, малдың чаш төлүн онча-менди камгалап арттырары – албан чериниң бирги чергеде айтырыы ол.

ТР-ниң Көдээ ажыл-агый болгаш аъш-чем яамызы арат бизнезин хөгжүдер фонду-биле кады малчыннарны деткип, кожууннарже мал чеминиң чедирилгезин организастаан. ТР-ниң Чазааның тургусканы курлавыр фондузундан 17 тонна мал чемин аалдарже чүдүрүп чоруткан. Курагин районундан немей эккээр 40 тонна сигенни ажыл-агыйларже чорудар.

Көдээ ажыл-агый яамызының тускай мергежилдиглери муниципалдыг тургузугларның көдээ ажыл-агый эргелелдери-биле ажыл-агыйларда нарын байдалды, мал чеминге хыналданы неделя санында чорудуп турар.

Күрүне деткимчезинге онза хереглелдиг араттар боттарының кожууннарының чагыргаларынче дилегни киирерин сүмелээн. Оон медээни Көдээ ажыл-агый яамызынче дамчыдыптарга, чогуур дуза хемчеглери алдынар.