Харагалзал болгаш ажаалда-тежээлде органнарының ажылын экижидер

Тываның Чазаа 2025 чылда Россия Федерациязының Чазааның бадылаан назы четпээннерге хамаарыштыр харагалзал болгаш ажаалда-тежээлде органнарының ажылын экижидериниң концепциязын боттандырары-биле албан черлер аразының ажылчын бөлүүн тургускан. Тываның Баштыңы [id360104045|Владислав Ховалыг] аңаа хамаарышкан айтыышкынга атты салган.

Тываның Баштыңының даалгазы-биле бөлүктү чазак даргазының өөредилге адырын харыылап турар оралакчызы Алексей Сазан-оол удуртуп эгелээр.

Чазак Даргазының оралакчызындан аңгыда, өөредилге, саң-хөө, шүүгү, кадык камгалал, күш-ажыл, социал политика яамыларындан база уруглар эргелериниң талазы-биле бүрүн эргелиг төлээ бөлүктүң составынче кирген. Харагалзал болгаш ажаалда-тежээлде органнарының ажыл-чорудулгазынга чаа аргаларны киирери – кол сорулга. Нормативтиг эрге-хоойлу баазаны сайзыраңгайжыдып, ажаалда-тежээлде органнарының специалистериниң мергежилин бедидери чугула апарган.

Тодаргайлаарга, харагалзал болгаш ажаалда-тежээлде органнарының организастыг тургузуун элээн өскертири планнаттынган. Ам ажаалда-тежээлде айтырыгларын муниципалитеттерниң бүрүн эргелерин дамчытпайн, регионалдыг деңнелге шиитпирлээр апаар.

Социал камгалалга хереглелдиг назы четпээннерниң тускайжыттынган албан черлеринге база өскүс уруглар организацияларының баазазынга ажылдаар уругларның эргелерин болгаш сонуургалдарын камгалаар талазы-биле комплекстиг төптер четкизин хөгжүдери көрдүнген.

Харагалзал болгаш ажаалда-тежээлде органнары өг-бүлени камгалап арттырар аргаларже кичээнгейни угландырып, ада-ие эргелерин катап тургузар дээн ада-иелер санын көвүдедир ужурлуг.

Ажы-төлдүг өг-бүлелерге аңгы-аңгы деткимче төптерин – амыдыралдың берге байдалынга таварышкан улуска социал деткимче көргүзер, өг-бүлелерге уругларны тургузарынга дузалаар, интернаттар доозукчуларынга өөредилге соонда деткимче көргүзери дээш, оон-даа өске аргаларны тургузар херек.

Чуртта өзүп-төрүттүнери болгаш хөй ажы-төлдүг өг-бүлелер үлүү эң бедик Тываның эрге-чагыргазы өг-бүле тургузуунче, ие-чаш база чаштар камгалалынче онза кичээнгейни салып турар.

Тываның Баштыңы февраль эгезинде өг-бүле болгаш ажы-төл камгалалының айтырыглары-биле ажылдап турар кижилерниң ат-алдарын бедидер сорулга-биле Харагалзал болгаш ажаалда-тежээлде ажылдакчызының хүнүн тургускан чарлыкты үндүргенин сагындыраал. Байырлалды май 18-те демдеглээр.