Эрзин кожууннуң девискээринде хем-суглар эриинде айыыл чок чоруктуң хемчеглерин күштелдиргенин республиканың немелде өөредилге сайзырадыр төвү дыңнаткан.
Кожууннуң чагырга чериниң ажылдакчылары, башкылар база өске-даа профилактиктиг ажыл чорудар албан черлериниң ажылдакчылары-биле кады хем эриинге хыналда үнүүшкүннерни хүннүң-не чорудуп турар.
«Хыналда үезинде хем эриинге улуг улустуң хайгааралы чок эштип турар уругларны ол дораан бажыңнарынга чедирип, ада-иезинге хүлээдир. Бо таварылгада ада-иелер административтиг харыысалгага онаажыр, торгаалды азы сагындырыгны бээр. Эрткен неделяның түңнели-биле алырга, хыналда үезинде ада-иезиниң хайгааралы чокка хем эриинге ойнап турган тос уруг илерээн. Оларны ада-иезинге хүлээткен болгаш, профилактиктиг чугааны чоруткан. Хем-суг эриинге уругларын хайгаарал чокка арттырбазын ада-иелерге сагындырып тур бис» – деп, кожууннуң төлээлери демдеглээн.
Хыналданың кол сорулгазы – хем-суг эриинге назы четпээннерниң хайгаарал чокка артып, озал-ондакка таваржырын болдурбазы. Үнүүшкүннер үезинде улуг улустуң хайгааралы чок назы четпээннерже кичээнгейни углаан.