Тыва үндезин культура төвүнге хендирбе сый шаварынга республика чергелиг I мөөрей болуп эрткенин төп дыңнаткан. Республиканың аңгы-аңгы кожууннарындан 28 киржикчи тыва чоннуң чаңчылчаан оюнунга киришкен.
Эрзин биле Тес-Хем кожуундан хөй санныг киржикчилер келген. Оларның аразындан Аңгыр-оол биле Артыш Кочанай адашкылар киришкеш, аарыкчыларның деткимчезин кымдан хөйнү алган. Мөөрейниң бедик деңнелге эрттип турарын улуг назылыг аарыкчылар онзагай демдеглээн.
Тыва үндезин культура төвүнүң даргазы Игорь Көшкендей маргылдааны эге базым кылдыр саналдаан. Шагаа үезинде төпке хендирбей сый шаварынга база республика чергелиг мөөрейни чарлаар.
Ук мөөрей тыва чоннуң онзагай оюннарының бирээзи болганда, ооң келир үеде сайзыралы кижи бүрүзүнге дорт хамааржыр. Хендирбе сый шавар мөөрейниң боттанганынга Тыва хүреш федерациязының даргазы Аяс Монгуш база Бурятияда чыл санында болуп турар хендирбе сый шавар мөөрейниң хөй дакпыр киржикчизи Айбек Шимет улуг деткимчезин көргүскен.
Бирги черни Тес-Хем кожууннуң Ү-Шынаадан «Хендирбе сый шаварының Авыргазы» аттың эдилекчизи Алексей Дапый-оол (шаңналы – 30 000 рубль) чаалап алган. Оон аңгыда ТР-ниң Даш чонукчуларының эвилелиниң даргазы Ай-Демир Шыырап тиилекчиге тыва бижек-биле шаңнаан.
Ийиги черге Эрзин кожууннуң Бай-Дагдан Найсам Дандаа (6, 23 секунда, шаңналы – 20 000 рубль) төлептиг болган. Тыва идик даараар ус-шевер Уранхай Сарыглар тиилекчини тыва кымчы-биле деткээн.
Үшкү черни Тес-Хем кожууннуң Ү-Шынаадан Артыш Чурукпан (13, 08 секунда, (шаңналы – 10 000 рубль)) чалап алган.
«Тергиин ойнакчы» деп тускай шаңналга Ү-Шынаа сумузунуң төлээзи Чимит Мажаа база Таңды кожуунуң төлээзи Дамырак Монгуш төлептиг болган.