Удавас хар эрип, үер болурунуң айыылы тургустунуп болур. Ооң-биле чергелештир, Хербис дааның эдээнде суг аксыр оңгарлар ол чоок-кавы бажыңнарның төккени боктан чыглып калган. Ында чуртталга бажыңнарын суг албазын дээш чурум чок чурттакчыларның октапкан богун арыглаар ажыл хоорай чагыргазынга чылдың-на онаажып турар. “Чаагайжыдылга” муниципалдыг унитарлыг бүдүрүлгези чүък сөөртүр “КамАЗ” автомаштналары-биле тонна-тонназы-биле бокту үндүр дажаан.
Ук албан чериниң ажылдакчылары чылдың-на чаңгыс ол-ла айтырыг-биле демисежип турарлар: даг эдээнде бажыңнарның чурттакчылары тускай сорулгага кастынган оңгарны бок төгер чер кылып алган. Эрткен чылдарның арга-дуржулгазындан алырга, бир эвес бокту аштап, арыглавас болза, эрээн харның суун өскээр чайып турар сордурукчулар боктан тунуп каар. Ооң түңнелинде – дамырактар оңгуну ашкаш, бажың-балгаттың девискээрин хөме ап келир.
