Хой кыргыыр бригада Хүт сумузунга четкен

Бии-Хем кожууннуң Аржаан сумузундан Аяс Сүрүнчүк биле Айлаш Салчактың өг-бүлези «Инек – чемгерикчи малым» төлевилелдиң 2019 чылдың киржикчилери. Оон бээр бода малының баш саны немежип өскен.

Өгнүң эр ээзи эрткен чылын социал керээ езугаар күрүне деткимчезин алгаш, хой кыргыыр тускай дериг-херекселди садып алган. Хой кыргылдазындан аңгыда ол шээр малдың кажаа-хораазынга ветеринарлыг дезинфекцияны база чорудуп турар.

Кыргыкчының бригадазын малчыннар, араттар социал четкилерде чарлал таварыштыр чалап ап турар. Дүүн Аяс Сүрүнчүк баштаан хой кыргыыр бригада кожууннуң чедери берге, онза чараш булуңнарының бирээзи – Хүт сумузунга четкеш, Ахмед Монгуштуң аалынга чымыштыг ажылын уламчылаан.

Мөңгүн-Тайга келини Айлаш Салчак өөнүң ээзи эге дээрезинде шээр малды хол хачызы-биле кыргып турганын сактып чугаалаар. Ам электрилиг хой кыргыыр машиналар кыргыкчыларның ажылын улам шапкынчыткан.

Хой кыргыыр бригада бөгүн Аржаанга хой кыргаан соонда, Сөөш сумузу, улаштыр Таңды кожуунда чагыг киирген малчынның аалынче аъттаныптарлар.

Аржаан сумузунуң хой кыргыыр бригаданың ажылын чон бедии-биле үнелеп, шалыпкын кыргыкчыларның кызымаан демдеглеп турар. Хой кыргылдазы доозулгуже дээр, олар дериг-херекселдери-биле чепсегленип алгаш, аалдар кезип, ажылдаарлаар.

Үш ажы-төлдүг өг-бүлениң баштыңы ус-шевер база. Ол өгнүң ханаларын, хараачазын, ынааларын, эжиин чазап, кышкы үеде национал тон, чеңи-чок, бөрт, идиктерни даарап турар. Аяс Сүрүнчүк тыва идик-хеп даараарда мал-маганыныё кежин эттээш, а өг херекселдерин кылыр тал, хады, хадыё ыяштарын ырак эвесте тайгадан кезип алыр. Тыва идикти неделя хире даараар.

Аржаан сумузунуң чагырга чериниң удуртулгазы хой кыргылдазы адакталып турарын дыңнаткан.