Чеди-Хөл кожууннуң Элегес суурунга аймактар аразынга хол бөмбүүнүң маргылдаазы болуп эрткенин чагырга чери дыңнаткан.
Хол бөмбүү спортунуң хоочуну Майя Самбуевна Чоодунуң 60 харлаанынга тураскааткан маргылдаага дөрт команда киришкен.
Чеди-Хөл кожууннуң чагырга даргазының социал-политика талазы-биле оралакчызы Нина Монгуш кадык амыдыралды тургузарынга спорттуң чугулазын онзалап демдеглээш, маргылдааны өг-бүлениң үнелиг чүүлдери-биле холбап, байыр чедирген.
Бирги черни Дагбаларның, ийиги черни Оюннарның, үшкү черни Самбууларның аймааның командалары чаалап алган.
Тиилекчилерни дириг хой, өртектиг белектер-биле шаңнаан.
Команда бүрүзү спортчу чүткүлдү болгаш чаңгыс демниин көргүскен. Маргылдааның киржикчилери чаа-чаа чедиишкиннерже сорук киирер спортчу хемчеглерни моон-даа соңгаар эрттирерин дугурушкан.
