Хандагайтыда чоокта чаа ажыттынган Улуг салгалдың харылзажыр төвүнге кырган-ава биле кырган-ача хүнүнге тураскааткан ыры-шоорлуг, оюн-тоглаалыг хемчег болуп эрткенин чагырга чери дыңнаткан.
Харылзажыр төвүнүң, кожуун чагыргазынын социал адырының ажылдакчылары хоочуннарны аяк шайже чалап, ужуражылганы организастап эрттирген.
Өвүр кожууннуң удуртулгазы хоочуннар-биле сырый харылзаалыг ажылдап турар. Росхереглелхайгааралдың Тыва Республика талазы-биле эргелелиниң болгаш төп кожуун эмнелгезиниң эмчилери улуг назылыгларга грипп халдавырынга удур профилактиг тайылбыр чугааны чоруткан.
Шайлаашкын соонда кожуун чагыргазының хуралдаар залынга чагырга даргазының социал политика талазы-биле оралакчызы Чодураа Шойдан юбилейи болган Комбу Хевекович биле Сара Андреевнага байыр чедирген.
"Улуг назынныгларже ээ көрнүп, аңгы-аңгы солун болгаш ажыктыг хемчеглерни эрттирип, үргүлчү чалап турарынга өөрүвес арга чок-тур" – деп, хоочун башкы Зоя Барынмаевна чугаалаан.
Оюн-тоглаага идепкейлиг киришкен командаларга медальдарны тыпсып, чигирзиг белектерни тывыскан.
Улуг салгалдың харылзажыр төвү буурул баштыгларга саң-хөө, хоойлу-дүрүм талазы-биле билиглерин бедидеринден аңгыда хостуг үезин солун болгаш ажыктыг эрттиреринге таарымчалыг байдалдарны тургузуп турар.
