Кызылдың назылап-кыраан болгаш шимчеп албас хамаатыларга дазылга бажыңының хоочуннары Кызыл-Мажалыктың ийи дугаар ортумак школазының 8 "а" клазының өөреникчилери-биле "Салгалдар харылзаазы" төлевиледиң ажылын уламчылап, Тыва дыл хүнүнге тураскааткан "Тыва дылым – ыдык эртинем" деп солун ужуражылганы онлайн хевирге демнежип эрттиргеннер.
Ужуражылга игилге хөгжүмнүг үделгези-биле эгелээн. Александр Даржайның "Тыва дылым" деп шүлүүнүң уран номчулгазын хоочун башкы Шангыр Ондар номчаан соонда өгбелер өөреникчилерге тыва ырларны ырлап, үлегер домактарны саат чокка чугаалап берип, боттары-биле таныштырганнар. Өөреникчилер база хоочуннарга шүлүктерин номчуп, оларның айтырыгларынга солун харыыларны бергеннер.
Кызыл-Мажалык ийи дугаар школаның тыва дыл болгаш чогаал башкызы Марта Тараачыновнага, физика эртеминиң башкызы Саян Владимировичиге кады ажылдажылга дээш четтиргенин Кызылдың дазылга бажыңы илереткен.
Хемчегниң киржикчилери ужуражылга солун болгаш бедик деңнелге эрткенин демдеглээннер.
