Хову-Аксы суурда эргижирээн ийи бажыңның чурттакчыларын чаа квартираларже көжүрер

Чеди-Хөл кожууннуң Хову-Аксы суурда Спортивная кудумчузунда 12 квартиралыг бажыңның база бир тудуу доозулган. Эргижирээн ийи бажыңдан үжен тос чурттакчыны чаа квартираларже көжүрер.

Тываның Чазаа «Амыдыралга инфратургузуг» национал төлевилелдиң «Чуртталга оран-савазы» федералдыг төлевилели езугаар чурттакчы чоннуң айыыл чок чуртталга байдалын хандырарын боттандырган.

Эргижирээн чуртталга бажыңнарындан хамаатыларны өскээр көжүрер программа киржикчилеринге 2020-2024 чылдарда Хову-Аксы суурда хөй квартиралыг чеди бажыңны туткаш, 312 кижиниң чурттаар байдалын экижиткен.

Тываның эрге-чагыргазының күжениишкиннери-биле 2017 чылдың январь 1-ге чедир ынчаар санаан эргижирээн чуртталга бажыңнарындан чурттакчыларны көжүрер программа ийи муниципалдыг тургузугда – Кызыл хоорайда болгаш Кызыл кожууннуң Каа-Хем суурда доозулган. 2024 чылдың төнчүзүнге чедир боттандырган «Чурттаар оран-сава болгаш хоорай хүрээлеңи» национал төлевилел-биле, Кызылда болгаш Каа-Хем хоорайжың суурда аварийлиг бажыңнардан 80 кижини көжүрген.
Оларга республика төвүнде хөй квартиралыг алды бажыңны туткан.

Регионнуң чазаа Чеди-Хөл кожууннуң Хову-Аксы суурда 4,6 муң дөрбелчин метр аварийлиг бажыңнардан 288 кижини өскээр көжүрер программаны доозар дээш акша-хөреңги дилээр ажылды уламчылап турар.

Федералдыг албан черлеринге регионалдыг программаны бадыткап камгалаанының ачызында, Россия Федерациязының Чазаа бо чылдың сентябрьда 70,2 сая рубльди бадылаан, ооң акша-хөреңги-биле аварийлиг бажыңнардан 41 кижини 2026 чылдың төнчүзүнге чедир өскээр көжүрер. 565 дөрбелчин метр ниити шөлдүг ийи аварийлиг бажыңда – Кызылда Эрзинская кудумчузу, 31 дугаар бажыңда база Кызыл кожууннуң Каа-Хем хоорайжың суурда, Пионерская кудумчузу 26 дугаар бажыңда 15 өг-бүлени өскээр көжүрери планнаттынган.

2019 чылдан эгелеп Тывада 7,72 муң дөрбелчин метр аварийлиг бажыңнарны өскээр көжүрген, чурттакчыларга хөй квартиралыг 13 – Кызылда алды, Хову-Аксыда чеди бажыңны туткаш, ажыглалче киирген.

Тудуг яамызы 2017 чылдың январь 1-ге чедир аварийлиг деп санаан хөй квартиралыг бажыңнар чурттакчыларын чыл төнчүзүнге чедир көжүрүп, бүрүткеткен соонда муниципалдыг тургузугнуң, азы Чеди-Хөл кожуун чагыргазының өнчүзүнче шимчевес объектини шилчидер.