Тыва үндезин культура төвүнге республика чергелиг I дугаар "Панчык" оюнунга маргылдаа болуп эрткенин төп дыңнаткан.
Тере-Хөл, Эрзин кожууннарындан 52 кижи санныг 26 ойнакчы бөлүк маргылдаага киришкен.
Дүшкүүрлүг оюннуң түңнелинде шаңналдыг черлер илереттинген. 1 черни – "Хөндей-Аксы" бөлүү (Сегбе Ай-Херел, Морган Айдыс 100.000 акша), 2 черни – "Артыштыг" бөлүү (Ижигин Сүрен, Чооду Айдың 50.000 акша), 3 черни – "Бай-Даг-1" бөлүү (Мунзук Камилл, Назын Эчис 25.000 акша), 4 черни – "Хиндиктиг-Хем" бөлүү (Сайын Төмүр, Даңмаа Төмүр 20.000 акша) чаалап алган.
Тускай шаңналдарга "Берге хаяачы" – Серээдар Доржу (10.000 акша), "Эң-не бичии панчыкчы" – Севек Даваа-Доржу (5000 акша) төлептиг болган.
Тыва чоннуң чаңчылчаан культуразында оюннар бир кол черни ээлеп турар. Тыва оюннар – төөгүден амыдыралдың эртер орууннуң дириг херечизи болуп, арга-хорганы, мерген угаанны, күш-шыдалды, тура-сорукту, сүлде-сүзүктү быжыктырарының бүзүрелдиг чепсээ. Оларның аразында Тываның мурнуу чүгүнүң чурттакчыларының амгы үеге чедир кадагалап арттырып алганы «Панчык» оюну хамааржып турар. Ук оюнну хуулгаазын алганныг-биле шишпип тургаш ойнаары онзагай.