Хуусаадан эрте төрүттүнген чаштар эмчилерниң ажаалда-тежээлдезинде

Бүгү делегейде хуусаадан эрте төрүттүнген чаштар хүнүн Өвүр кожууннуң төп эмнелгезинде уруглар салбырынга демдеглеп эрттирген.

Бо чылдың 10 айның дургузунда 96 чаш төрүттүнген. Оларның үжү хуусаадан эрте чаяаттынган. Хуусаадан эрте төрүттүнериниң чылдагааны иезиниң кадыкшылындан база өске чылдагааннардан хамааржыр. Эмчилерниң демдеглеп турары-биле алырга, ковид аарыы иштиг-сааттыг иелерге база салдарлыг болган.

Эрте төруүттүнген кили четпес чаштарны эмчилер доктаамал ажаалда-тежээлдеге ап, халдавырлыг аарыгларга удур камгалал тарылгаларны салып, медицина шинчилгезин чорудуп турарлар. Өвүрнүң төп эмнелгезиниң уруглар эмчизиниң Шеңне О-Деликтиң дыңнадып турары-биле алырга, чаштар эки байдалда, сайзыралы озал чокка өзүп турар.

Бөгүн хуусаазындан эрте төрүттүнген чаштар хүнү. Тывада чыл санында 400 хире чаштар кили четпес төрүттүнүп турар. Кадык төлдү бодарадып алыры ада-иезинден дорт хамаарылгалыг. Эмчилер келир үениң иелери боттарының кадыкшылынче кичээнгей салбайн турарын демдеглеп турар. Ынчангаш херээженнер консультациязының даңзызынга эрте туруп алгаш, кадыкшылын доктаамал шинчиледири чугула.