Тес-Хем кожууннуң Ак-Эрик сумузундаy Күр-Дагба биле Салбакай Ланааларның өг-бүлези, төрел аймаа "Хымыс байырлалы" деп улуг хемчегни Ак-Кежиг деп чайлаанга эрттиргенин Национал школа хөгжүдер институт дыңнаткан.
Уксаалыг аъттарны азырап, кулунну тыртып, бени саап, хымыс бүдүрүлгезин эгелеп турар өг-бүле-биле Национал школа хөгжүдер институт кады ажылдажылгазын уламчылап, "Хымыс байырлалынга" аалдап четкен.
Байырлалдың аалчыларынга чылгычы өг-бүле белерин саап турар арга-дуржулгазын көргүскен. Бе саалдазы дээрге тыва улустуң шаг шаандан бээр кылып келген ажыл-ижиниң бирээзи. Бе сүдүнден кылган хымыс – эм шынарлыг, сүүзүннүг чем.
Оон аңгыда Национал школа хөгжүдер институттуң ажылдакчылары байырлыг хемчегниң мөөрей кезээнге шииткекчилеп ажылдааннар. "Каас, чараш тыва хевим" деп мөөрейге институттуң ажылдакчылары Азияна Саая база Чочагай Хомушку шииткекчилээн. Кожамык мөөрейин Аңчы Хомушку удуртуп, шииткекчилеп эрттирген.
Ланаалар чылгычыларның чаңчылчаан амыдыралын, малынга хүндүткелдиин болгаш күш-ажыл кижизидилгезиниң хөй-ниитиге тарадып чоруур үлегерлиг өг-бүле.
Хымыс байырлалының аңгы-аңгы хемчеглерин Национал школа хөгжүдер институт өөредилге шугумунга ажыглаар сорулгалыг чыып, тырттырган.