Ийи дылдыг ниитилелге уругларны кижизидери

Тываның гуманитарлыг болгаш социал-экономиктиг тускай шинчилелдер институдунга өргүн чонга, ажы-төлүн кижизидип чоруур улуска, уруглар садтарының башкыларынга кыска өөредиг болуп эрткенин институт дыңнаткан.

Оюмаа Саая «Бичии уругларга тыва ырылар» дугайында чедимчелиг илеткелди кылган. Школа назыны четпээн уругларга ырылар номнары-биле таныштырып, кандыг ырыларны сүмелеп болурун, бичии уругларның делей билиишкиннин делгемчидип, сөзүнүң курлавырын байлакшыдарының дугайында солун билиглерни дыңнакчылар-биле үлешкен.

Антонина Донгак – филология эртемнериниң кандидады, аас-чогаал секторунуң башкарыкчы эртем ажылдакчызы «Мигир-Мижит хаан» дугайында тоолдуң Тывага тыптып келген төөгүзүн, кандыг тоолдар бистиң аас-чогаалывысче үлегерлеттинип келгенин солуну-биле таныштырган.

Тыва дылдың электроннуг очулдурукчузу – дыл билиглерин делдемчидер база бир арга болуп турарының дугайында Эллада Аннай таныштырып, келген киржикчилерниң ноутбуктарынга #тыва_таналды киирерин көргүзүп тургускаш, очулга арын-биле таныштырып көргүзүглүг ажылды кылган.

Любовь Хертек ийи дылдыг ниитилелге уругларны кижизидериниң дугайында ажык чугааны кылып, амыдыралдан үлегер-чижектерни көргүскен.