Тываның Баштыңы Владислав Ховалыг Ажаалга банкызының чиигелделиг ипотеказынче билдириишкиннерни хүлээп эгелээнин дыңнаткан. Федералдыг деткимче-биле узаткан программа база бир чыл уламчылаар.
«Ипотеканың негелделери чедингир болуп өскерилге чок арткан: чээлиниң бүгү хуусаазында ол ийи хуу ставкага быжыглаттынган. Ук хемчег республиканың экономиказынга улуг салдарны чедирер дээрзинге бүзүрээр мен» – деп, Владислав Ховалыг демдеглээн.
Бо үеге чедир программа 3300 ажыг өг-бүлениң чурттаар байдалын экижидеринге дузалаан. Ооң боттандырылгазы тудуг ажыл-агыйын шапкынчыдып, ажылчын олуттарны тургузуп, үндүрүг орулгаларын көвүдеткен.
«Чаа бажыңнар санының көвүдээни инфртургузуг тудуун – школалар, уруглар садтарын тудуп, коммунал четкилерни чаарткан. Ынчандыр чиигелделиг ипотека чүгле социал деткимче хемчээ эвес, а бүгү республиканың комплекстиг хөгжүлдезиниң шимчедикчизи болуп турар» – деп, регионнуң баштыңы демдеглээн.
Тываның Баштыңы Россияның Саң-хөө яамызы биле Тудуг яамызы республика девискээринге программаның тускай негелдезин ам-даа узадып, деткээн дээрзин ооң мурнунда-ла дыңнатканын сагындыраал.
2026 чылда ол негелделерни узатканындан Тывада өг-бүлелерге ипотека чээлизиниң ставказы ийи хууда хевээр арткан болза, чурттуң чамдык регионнарында чиигелделиг ставка алды хууга дең.
