Иркутск облазындан ужуп келген чаъс чагдырар самолет өрттерни өжүрер

Тываның Арга-арыг ажыл-агый яамызының дилээни-биле, Иркутск облазындан чаъс чагдырар самолет-чаштырыкчы Федералдыг арга-арыг ажыл-агый агентилелиниң айтыышкыны езугаар ужуп келген.

Регионалдыг арга-арыг ажыл-агый яамызының медеглээни болза, июнь 22-де республиканың арга-арыгларында 16 өрт хып турар: Кызыл, Каа-Хем, Тожу, Таңды, Улуг-Хем база Бии-Хем кожууннарда тайгалар өрттенген. Тожу кожуунда «Азас» камгалалдыг черниң участоктары элээн каш хонукта өрттенип турар.

Өрттерни өжүреринче авиа-өрт албан чериниң, арга-арыг өрт станцияларының, өрт кезектериниң арга-арыг камгалалының, парашютчу-десант өрт албанының 289 ажылдакчызы хаара туттунган. Тываның Арга-арыг ажыл-агый яамызының курлавырында ам-даа 89 кижи база 103 санныг техника бар.

Чаъс чагдырар самолет Тожу, Каа-Хем, Таңды база Кызыл кожууннарның тайгаларында өрттенип турар участоктарга ажылдаан. Чаъс чагдырар дээш пирооктар-биле булуттарже атканының түңнелин амдыызында шинчилеп турарын, Тываның арга-арыг камгалал чери дыңнаткан.

Тывага бо чылын өрт айыылы эгелээнден бээр, эрткен 2022 чылга деңнээрге ийи катап хөй, 57 өрт бүрүткеттинген.