Иштики херектер ажылдакчызының хүнүнде шылгарааннага шаңналдарны тывыскан

Дүүн, ноябрь 10-да, Россияда иштики херектер ажылдакчылары профессионал байырлалын демдеглеп эрттирген. Улусу чогаадылга бажыңынга республиканың корум-чурум камгалаар органнар удуртукчуларының, ТР-де Иштики херектер яамызының ажылдакчыларының, оларның өг-бүле кежигүннериниң болгаш хоочуннарның киржилгези-биле байырлыг хемчег болуп эрткен.

ТР-ниң Чазак Даргазының оралакчызының албан-хүлээлгезин күүседип турар Айдын Чюдюк Тываның Баштыңы Владислав Ховалыгның адындан республиканың корум-чурум камгалаар органнарының ажылдакчыларынга байырны чедирген. Ол республиканың корум-чурум тудукчулары хоойлу күүселдезин шынчы болгаш эрес-дидим база бедик мергежилдиг хайгаарап турарындан, хөй-ниитиниң айыыл чок чоруу таарымчалыг байдалда деп демдеглээн.

– Мурнуңарда салдынган хөй-ниитиниң айыыл чоруунуң, хоойлу болгаш корум-чурум камгалалын дыштаныр дыжыңар бодавайн доктамаал хайгааралда алган силер.
ТР-ниң Иштики херектер яамызы ажыл-албанның аңгы-аңгы угланыышкыннары улуг арга-дуржулгалыг, быжыг матераил-техниктиг бааза тургустунган, ажылдакчылар болгаш хоочуннар салгалдан салгалче чараш болгаш быжыг езу-ужурларын камныг дамчыдып чоруур – деп, Айдың Чюдюк демдеглээн.

“Төрээн чуртунуң сонуургалдарынга шынчы бооп, Ада-чуртка төлептиг албан ажылының үлегер-чижээн көргүскен албан чериниң хоочуннарынга четтиргенин илереткен. Албанның 20 ажыг хоочунарынга боттарның күзели-биле тускай шериг операциязында киржип чоруур.

ТР-ниң Чазак Даргазының оралакчызының албан-хүлээлгезин күүседип турар Айдың Чюдюк албан хүлээлгезин төлептиг күүсеткеш шылгараан ажылдакчыларга күрүне шаңналдарын тывыскан.

Иштики херектер органнарынга хөй чылдарда төлептиг албаны болгаш хөй-ниити ажылынга идепкейжи чоруу дээш Тыва Республикада ИХЯ-ның экономиктиг айыыл чок чорук болгаш коррупцияга удур хөделиишкин эргелелиниң хоочуннар эге организациязының кежигүнү – халажылгада милицияның подполковниги Андрей Тываның Баштыңының Өөрүп четтириишкин бижиин тывыскан.

Тыва Республикада ИХЯ-ның каразыттырган болгаш буруудаттырганнар кадарар болгаш аргыштырар аңгы ротаның 1-ги взводунуң полицейжизи (чолаачызы) – полицияның улуг сержантызы Ай-Херел Монгушка, Тыва Республикада ИХЯ-ның наркотиктер саарылгазынга хыналда чорудар эргелелдиң онза чугула херектер талазы-биле бүрүн эргелиг төлээзи – полицияның капитаны Сылдыс Лоовайга ажыл албанынга бедик үре-түңнелдиг чедиишкиннери болгаш албан хүлээлгелерин ак сеткилдиг күүсеткени дээш Тываның Баштыңының Өөрүп четтириишкин бижиктерин тывыскан.

Россия Федерациязының Иштики херектер яамызының Кызыл хоорайда эргелелиниң полицияның хайгыыл-доскуул албанының аңгы ротазының 1-ги взводунуң командириниң оралакчызы – полицияның улуг лейтенантызы Белек Шактарга оперативтиг-албан ажыл-чорудулгазында бедик көргүзүглери, онза нарын болгаш чугула даалгаларны күүсеткени дээш Тываның Баштыңының Өөрүп четтириишкин бижиин тывыскан.

Россия Федерациязының Иштики херектер яамызының муниципалдар аразының «Кызылский» килдизиниң полицияның №6 килдизиниң (Сарыг-Сеп суур) баштайгы истелге килдизиниң бөлүк начальниги – полицияның майору Майя Маадыр-оолга албан хүлээлгелерин ак сеткилдиг күүсеткени, ажылында бедик профессионал көргүзүглерлиг чедиишкиннери дээш Тываның Баштыңының Өөрүп четтириишкин бижиин тывыскан.

Россия Федерациязының Иштики херектер яамызының муниципалдар аразының «Улуг-Хемский» килдизиниң полицияның №5 килдизиниң (Чаа-Хөл суур) баштайгы истелгеже пунктузунуң эге истекчизи – полицияның майору Айяна Васильевна Манчалмааны Тыва Республиканың Баштыңының Хүндүлеле бижии-биле шаңнаан.

Ол ышкаш Тыва Республикада Иштики херектер яамызының Хоочуннар чөвүлелиниң оперативтиг-албан ажыл-чорудулгазында бедик үре-түңнелдерни чедип алган аныяк ажылдакчыларга чылдың-на тыпсып турары шаңналдарын база тывыскан. ИХЯ-ның аңгы-аңгы кезектеринден алды ажылдакчыларны шаңналга төлептиг болган.