Тываның Баштыңы Владислав Ховалыг Дээди Хуралга Айыткалын таныштырып тура, бо чылдың август айда Тывага болуп эртер IV делегей чергелиг буддийжи шуулганга ачы-дузазын көргүзер эк турачылар командаларын чыып эгелээнин чарлаан.
Регионалдыг Аныяктар херектериниң талазы-биле яамызының дыңнатканы болза, волонтерлар буддийжи делегейде улуг ужур-уткалыг болуушкуннарның бирээзин белеткежиринге болгаш организастажырынга дараазында угланыышкыннарга үлүг-хуузун киирип болур:
- российжи болгаш даштыкы киржикчилерни уткуп, оларны хемчеглер үезинде үдээри;
- бүрүткел, информация болгаш аай-дедир шимчээшкин пунктуларының ажылынга дузалажыры;
- ажыл-агыйжы, культура болгаш эртем программаларын организастаарынга дуза көргүзери;
- делегациялар, спикерлер, массалыг информация чепсектери база шуулган киржикчилери-биле ажылдаары дээш, оон-даа өске.
2026 чылдың февраль 1-ден март 31-ге чедир эки турачыларны чыыр. Бүрүткеттинген эки турачыларга өөредилге курузун эрттирип, ооң соонда алган билиглерин болгаш арга-мергежилдерин быжыглаары-биле хынаар.
2026 чылдың июнь 27-де болур Аныяктар хүнүнде эки турачыларның сөөлгү даңзызын бадылаар. Ол хүн киржикчи бүрүзү IV делегей чергелиг буддийжи форумнуң эки турачызы деп шынзыдылганы алыр.
«Добро.РФ» чаңгыс аай ифнормация системада :dobro.ru/event/1150... айтыг-биле хемчегге бүрүткедип ап болур.
