Россияның бүгү девискээрлеринден эки турачылар Тывага эртер IV-кү делегей чергелиг буддийжи шуулганга киржир күзелин илереткен
Тывага болуп эртер IV делегей чергелиг сарыг шажын шуулганы август айда бүгү делегейден буддийжи чүдүлгениң, эртемденнерниң болгаш хөй-ниити ажылдакчыларының аразында чугааның кол шөлү апарып, ажыл-чорудалгазынче эки турачыларны хаара тудар.
Хемчегни эрттиреринге дузалажыр кылдыр Калининградтан Приморьеге чедир чурттуң бүгү булуңнарындан билдириишкиннер кирип турар. Эки турачыларны dobro.ru/event/1150... айтыгга бүрүткеп доозарынга чедир 20 хонук арткан.
ТР-ниң Аныяктар херектериниң талазы-биле яамызының медээзинден алырга, марттың 11-ге чедир Россияның 34 регионундан 377 билдириишкин киирген. Эң хөй билдириишкиннерни Тыва Республика – 206, Москва – 33, Калмык Республика – 19, Хакас Республика – 19, Новосибирск облазы – 12 база Краснодар край – 11 киирген. Эки турачыларның ортумак назы-хары – 35 хар четпес.
Шуулганның эки турачылар программазында аңгы-аңгы угланыышкынныг ажылдар кирген: киржикчилерге болгаш делегацияларга логистика деткимчези болгаш эдертип чоруурундан эгелээш, культурлуг хемчеглерни организастаарынга болгаш очулдурукчулаарынга дузаны көргүзери. Ол ышкаш эки турачылар аразындан тускай эртемниг кордакчыларны медицина-биле хандырылга бөлүүнче хаара тудар.
Март 31-ге чедир «Добро.РФ» чаңгыс аай иформация системада :dobro.ru/event/1150... айтыг-биле хемчегге бүрүткедип ап болурун Аныяктар яамызы сагындырган. Кордакчылар бүрүткеткен соонда, эге өөредилгени болгаш шылгалдаларны эртер. Эки турачыларның түңнел даңзызын бадылааш, Аныяктар хүнүнде, июнь 27-де таныштырар.
Августуң 17-ден 20-ге чедир Тывага IV делегей чергелиг сарыг шажын шуулганы болуп эртер. Ол шуулган шажын болгаш культуралар аразында харылзааны быжыглап, тайбың болгаш энерел сеткилдиң угланыышкыннарын нептередир ужурлуг.